«Дусларын үзенең туган көненә алып кайта иде» – дүрт студент авариядә һәлак булган
27 октябрьдә Самара өлкәсендә трассада бензин ташый торган машина белән авариядә 4 студент егет һәлак булган. Рульдәге егет дусларын үзенең туган көнен бәйрәм итәргә алып кайта. Егетләр һәм кызлар Самарадан Хворостянкага таба барган. Бу турыда «Комсомольская правда» яза.
- Бензин ташый торган машина белән авариядә 4 кеше һәлак булган, дип язган идек.
Волжский районында «ВАЗ-2114» машинасы бензин ташый торган «Скания»гә бәрелә. Җиңел машинада 2 кыз һәм 2 егет була. Егетләрнең берсенә 17 яшь, калганнарга 18 яшь.
«Барысы да Хворостянкада яши иде. Самарада укыдылар. Ул көнне, бергәләп, Диманың туган көнен уздырырга кайтып киләләр иде. Дима рульдә була, 27 октябрьдә аңа 19 яшь тула», – ди сыйныфташлары.
Машинада Диманың сөйгән кызы да була. Алар бергә Хворостянка мәктәбендә укый, аннары очраша башлыйлар. Машинадагы тагын бер кыз да аларның сыйныфыннан. Кызлар Самара педагогика университетында укый.
«Мәрхүмнәрнең ата-аналарын яхшы беләм, бик яхшы гаиләләр, барысы да дәүләт структураларында эшли. Аларга бик авыр инде», – ди биредә яшәүче кеше.
Эчке эшләр министрлыгы белешмәсе буенча, җиңел машина «Скания»нең ярымприцептагы цистернасына бәрелә. Аның белән 52 яшьлек ир-ат идарә итә.
Тикшерү эшләре бара, диелә хәбәрдә.