Татарстан юлларында ике авариядә дүрт кеше һәлак булган
Татарстанның Чистай һәм Биектау районнарында ике котычкыч юл-транспорт һәлакәте булган. Ике очракта да автомобильләр каршы як полосага чыккан. Ике авария нәтиҗәсендә дүрт кеше һәлак булган. Бу хакта Дәүләт автоинспекциясе телеграм-каналында хәбәр ителә.
Чистай районында Nissan Tiida автомобиле йөртүчесе, якынча мәгълүматлар буенча, каршы як полосага чыгып, Nissan Note машинасы белән бәрелешкән. Бәрелү шулкадәр көчле булган, ике автомобиль йөртүчесе дә урында җан биргән.
Фото: t.me/gibddtatarstan
Биектау районында да охшаш фаҗига теркәлгән. «Лада» автомобиле йөртүчесе, якынча мәгълүматлар буенча, каршы як полосага чыккан һәм Cherry машинасы белән бәрелешкән. Авария нәтиҗәсендә «Лада»ның йөртүчесе һәм бер пассажиры урында ук һәлак булган.
Фото: © t.me/gibddtatarstan
Татарстан Республикасы Дәүләт автоинспекциясе юл йөрү кагыйдәләрен төгәл үтәргә өнди!